कञ्चनपुर- वेदकोट नगरपालिकाले कोरोना भाइरस (कोभिड १९) संक्रमित विरामीको उपचारका लागि कोभिड अस्पताल सञ्चालनमा ल्याएको छ । चिकित्सक सहित स्वास्थ्यकर्मी व्यवस्थापन गरी सामादैजीमा अस्पताल सञ्चालनमा ल्याएको हो ।
अस्पताल सञ्चालन अघि नगरपालिकाका दुई कर्मचारीले ज्यान गुमाई सकेका छन् । दुई दिन अघि मात्रै नगरपालिकाको स्वास्थ्य शाखाकी अनमी सरस्वती कार्कीले कोरोना संक्रमणबाट ज्यान गुमाएका थिइन् ।
यस अघि गर्न शिक्षा अधिकृत शंकरदत्त भट्टले कोरोना संक्रमणबाट ज्यान गुमाएका थिए । कोरोनाबाट कर्मचारीले ज्यान गुमाउन थालेपछि नगरपालिका संक्रमणको उच्च जोखिममा भएको आशंका गरिएका छन् ।
कोरोना महामारीको पहिलो र दोस्रो चरणमा नगरपालिका कर्मचारीले ज्यान गुमाएका हुन् । पहिलो चरणको महामारी फैलिएपछि बेदकोटमा सबैभन्दा पहिला संक्रमण देखिएको थियो ।
नगरपालिकाले गत वर्ष अस्पताल बनाउने घोषणा गरेको थियो । नगरपालिकाले दोस्रो चरणको महामारी फैलिएपछि अस्पताल सञ्चालनमा ल्याएको हो ।
बेदकोटका मेयर अशोक कुमार चन्दले अस्पताल उद्घाटन गरेका छन् । उद्घाटनमा नगर उप प्रमुख सुशिला सिह सहित वडा अध्यक्ष, सदस्य, कर्मचारी सहभागी भएका छन् ।
