महेन्द्रनगर । बाजुरामा बालिकालाई जबर्जस्ती करणी गरेको आरोपमा प्रहरीले एक जना शिक्षकलाई पक्राउ गरेको छ । बाजुराको जगन्नाथ गाउँपालिका–२ कोल्टिमा बालिकालाई जबरजस्ती करणी गरेको आरोपमा शुक्लाफाँटा नगरपालिका–८ का २४ वर्षिय भीम ठगुन्ना पक्राउ परेका हुन् ।
कोल्टिमा रहेको एक होटलमा सुतिरहेकी बालिकामाथि जबरजस्ती करणी गरेको आरोपमा उनलाई पक्राउ गरिएको जिल्ला प्रहरी कार्यालय बाजुराका प्रहरी निरीक्षक धनदेव साउँदले बताए ।
‘माघ २० गते बालिकाका आफन्तले उजुरी दिएका थिए,’ उनले भने, ‘ठगुन्नालाई माघ २३ गते पक्राउ गरी अदालतबाट ७ दिनको म्याद थप गरेर अनुसन्धान गरिरहेका छौं ।’ शुक्लाफाँटा नगरपालिका–८ का बासिन्दा ठगुन्ना बाजुराको सेती कर्णाली एकेडेमी बोर्डिङ स्कुलमा शिक्षण गराउँदै आएका थिए ।
