नपिद्व: फेसबुकले म्यानमारको सेनालाई आफ्नो सेवा प्रयोग गर्नबाट प्रतिबन्ध गरेको छ ।
यस्तै सेनासँग सम्बन्धित निकायहरुलाई पनि फेसबुकले पहुँच रोकिदिएको छ । म्यानमारमा जननिर्वाचित सरकारलाई अपदस्थ गरी हालै सेनाले कू गरेपछि फेसबुकले उसमाथि लगाएको सबैभन्दा कठोर निर्णय हो ।
म्यानमारको सेनाले फेसबुकसँगै इन्स्टाग्रामको पहुँचबाट पनि प्रतिबन्धित हुनेछ । फेसबुकले म्यान्मारका सेनालाई फेसबुक र इन्स्टाग्रामको प्रयोग गर्न दिँदा उच्च जोखिम हुने भन्दै यस्तो निर्णय गरेको जनाएको छ ।
गत नोभेम्बरमा म्यानमारमा सम्पन्न निर्वाचनमा धाँधली भएको भन्दै यहाँको सेनाले कू गरेको थियो । साथै उसले निर्वाचनमा धाँधली भएको कुरा फेसबुकमार्फत प्रचार समेत गर्दैआएको छ । तर धाँधली भएको कुनै प्रमाण सेनाले पेश गर्न सकेको छैन ।
म्यानमारको सेनाको कदमप्रति अन्तर्राष्ट्रिय समुदायले समेत कडा आलोचना गरेका छन् । साथै म्यानमारका जनताहरु सेनाको विरोधमा सडकमा उत्रिएर विशाल र्याली निकालेका छन् ।
