काठमाडौँ — नेकपा अध्यक्षद्वय पुष्पकमल दाहाल र माधवकुमार नेपालले बुधबार बूढानीलकण्ठ पुगेर कांग्रेस सभापति शेरबहादुर देउवालाई अब सँगै मिलेर जान आग्रह गरेका छन् ।
सर्वोच्च अदालतले प्रधानमन्त्री केपी शर्मा ओलीको पुस ५ गते प्रतिनिधिसभा विघटन गर्ने असंवैधानिक कदमलाई मंगलबार बदर गरेपछि भोलिपल्टै दाहाल र नेपाल देउवालाई भेट्न उनकै निवास पुगेका हुन् ।
नेकपा अध्यक्ष नेपालले भने, ‘कांग्रेस पार्टी, जसपा र केपी ओलीको प्रतिगमनविरुद्धमा रहेका पार्टीहरुसँग मिलेर जाने पक्षमा हामी छौं । केपी ओलीले राजीनामा दिन्छन् भने सबैभन्दा राम्रो । राजीनामा दिएनन् भने उहाँलाई निकाल्नु पर्छ र अर्को संयुक्त सरकार बनाउनु पर्छ, मिलेर अघि बढ्यौं भन्यौं ।’
देउवाका स्वकीय सचिव भानु देउवाले भने,‘उहाँहरुले मिलेर आयौं भनेर सभापतिजीलाई भन्नुभयो । उहाँले पार्टी भित्रमा छलफल गरेर भन्छु भन्नु भएको छ ।’ उनका अनुसार कांग्रेसको शीर्ष नेताहरुसहित पदाधिकारीहरुको बैंठक बिहीबार देउवा निवासमा बोलाइएको छ ।
