जाजरकोट । जिल्लाको कुशे गाउँपालिका–१ स्याँक्रीका एकैघरका चार बालिकाको मृत्यु भएको छ । जंगली च्याउको तरकारी खाँदा तीन बालिकाको मंगलबार र एकको सोमबार मृत्यु भएको हो ।
च्याउ खाएका अन्य चारजना बिरामी परेका छन् । स्याँक्रीका ५० वर्षीय टेकबहादुर चलाउनेले ९ साउनमा जंगलबाट च्याउ टिपेर ल्याएका थिए । साँझ च्याउको तरकारी खाएका उनीहरूलाई त्यही रातिदेखि बिसन्चो भएको थियो ।
घरका आठैजना बिरामी परेकाले गाउँकै मेडिकलबाट औषधि लिएर खाएका थिए । उनीहरू च्याउ खाएको तीन दिनपछि सिकिस्त भएका थिए । त्यसपछि मात्रै गाउँलेले उपचारका लागि प्रयास गरेका हुन् ।
टेकबहादुरकी छोरी तीन वर्षीया अञ्जनाको सोमबार गाउँमै मृत्यु भएको जिल्ला प्रहरी कार्यालयले जनाएको छ ।
बालिकाको मृत्यु भएपछि परिवारका अन्य सातजना सदस्यलाई गाउँपालिकाले नेपाली सेनाको हेलिकोप्टर चार्टर्ड गरेर सोमबार नै सुर्खेतस्थित कर्णाली प्रादेशिक अस्पताल लगेको थियो ।
उपचारका क्रममै मंगलबार तीन बालिकाको मृत्यु भएको अस्पतालले जनाएको छ ।
प्रादेशिक अस्पतालको मेडिकल विभाग प्रमुख डा केएन पौडेलले टेकबहादुरकी छोरी १६ वर्षीया औसरा, १३ वर्षीया धनसरा र नातिनी ११ वर्षीया निरुताको मृत्यु भएको बताए ।
‘ढिलो गरी अस्पताल ल्याएको हुँदा च्याउको विषले धेरै असर गरिरहेको भएकोले जति कोसिस गर्दा पनि बचाउन सकिएन,’ डा।
पौडेलले भने । च्याउ खाँदा बिरामी परेका टेकबहादुरसँगै उनका छोरा ३० वर्षीय ललित, बुहारी ३० वर्षीया कल्पना र छोरी १५ वर्षीया पशुपतिको प्रादेशिक अस्पताल सुर्खेतमै उपचार भइरहेको छ ।
उनीहरूमध्ये कल्पनाको अवस्था गम्भीर भएकोले उनको आइसियूमा राखेर उपचार भइरहेको छ । अन्य तीनजनाको स्वास्थ्यमा सुधार भइरहेको डा। पौडेलले बताए ।
