काठमाण्डौ, १६ माघ । निर्वाचन आयोगले राजनीतिक छलफलका लागि भन्दै नेकपाका दुवै अध्यक्षलाई कार्यालयमा बोलाएको छ ।
आयोगले बिहीबार पत्र लेखेर प्रधानमन्त्री केपी शर्मा ओली र पुष्पकमल दाहाल प्रचण्डलाई ५५ जना प्रतिनिधिसहित कार्यालयमा बोलाएको हो ।
तर, ओली र प्रचण्ड दुवै जना निर्वाचन आयोगको कार्यालय बहादुर भवन नजाने भएका छन् । सत्तारुढ नेकपामा संसद विघटनपछि राजनीतिक विभाजन देखिएको छ ।
जसमा एउटा समूहको नेतृत्व प्रधानमन्त्री ओली र अर्को समूहको प्रचण्ड तथा माधव कुमार नेपालले गरिरहेका छन् ।
सरकारले गत पुस ५ गते संसद विघटन गरेपछि प्रचण्ड-माधव समूह सडक संघर्षमा रहेको छ । उनीहरुले सरकारको कदम असंवैधानिक र प्रतिगामी भएको भन्दै आन्दोलन गरिरहेका हुन् ।
प्रचण्ड र नेपाल दुवै जना विरोध सभालाई सम्बोधन गर्न आज प्रदेश १ को विराटनगर जाँदैछन् । जसकारण आयोगमा प्रतिनिधिहरु मात्रै जाने प्रचण्डका प्रेस संयोजक विष्णु सापकोटाले जानकारी दिए ।
प्रधानमन्त्री ओलीको पनि आयोगमा जाने कार्यसूची नरहेको प्रेस सल्लाहकार सूर्य थापाले जानकारी दिए । प्रधानमन्त्रीको तर्फबाट सुवास नेम्वाङसहितको प्रतिनिधि आयोगमा जाने तयारी छ ।
