सुदूरपश्चिम प्रदेश सरकारले चार जिल्लामा कोरोना संक्रमण दर पत्ता लगाउन एन्टिजेन विधिबाट परीक्षण सुरु गरेको छ ।
प्रदेशको सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले कैलाली, कञ्चनपुर, डोटी र अछामका हटस्पट मानिएका गाउँ र वडामा एन्टिजेन परीक्षण सुरु गरिएको जानकारी दिए ।
स्थानीय तहका प्रयोगशाला प्राविधिकलाई तालिम र किट उपलब्ध गराएर परीक्षण थालिएको उनले बताए । यसअघि कोरोना संक्रमण दर उच्च देखिए पनि अहिले घटेको उनको दाबी छ ।
प्रदेश स्वास्थ्य निर्देशक डा. गुणराज अवस्थीले एन्टिजेन विधिबाट एक घण्टामै परीक्षण रिपोर्ट आउने र अभियान सञ्चालन गरिएका सबै क्षेत्रको संक्रमण दर थाहा पाउन १० दिन लाग्ने बताए । स्वास्थ्य कार्यालय प्रमुख ललित धामीले कैलालीका १३ वटै स्थानीय तहमा एन्टिजेन परीक्षण सुरु भइसकेको जानकारी दिए ।
