डडेल्धुरा – डडेल्धुराको पर्शुराम नगरपालिका वडा न. ५ परिगाँउमा अवस्थित सुदूरपश्चिमकै प्रसिद्ध धार्मिक तथा पर्यटकीयस्थल पर्शुराम धाममा लाग्ने पर्शुराम (फरसनाम) मकर मेलामा गंगा स्नान, नित्य पूजा र देवताका देउरा स्नानमा कुनै रोक नरहेको पर्शुराम नगरपालिका नगर प्रमुख भीम बहादुर साउँदले बताएका छन् ।
मेयर साउँदले टाढा-टाढाबाट, मेला भर्न, श्रद्वालु भक्तजनहरु आउने क्रम सुरु भइसकेको छ । नित्य पुजा, गंगास्नान, देउरा स्नानमा नगरपालिका र क्षेत्र विकास समितिले रोक नलगाएको उनले प्रस्ट्याएका छन् ।
नगरपालिकाका एक जना कर्मचारीमा कोरोना देखिएपछि माघ २ गते सम्मका लागि कार्यालय बन्द गरिएको छ । पुस २२ गते अन्य सबै कर्मचारीको स्वाब संकलन गरी परीक्षणका लागिसमेत पठाइसकेको जनाइएको छ ।
कोरोना जोखिमलाई ध्यानमा राखी आकस्मिक रुपमा परशुराम मेलामा भिडभाड, पसल, स्टल, सांस्कृतिक, धार्मिक महोत्सव आयोजना नगर्न-नगराउन सूचनामार्फत जानकारी गराइएको हो । तर नित्यपूजा, गंगास्नान, देउरा स्नानमा रोक नलगाएको नगरप्रमुख साउँदले बताएका छन् ।
