प्रहरीले चितुवाको छाला र हड्डीसहित तीन जनालाई पक्राउ गरेको छ । सुदूरपश्चिम प्रदेश प्रहरी र जिल्ला प्रहरी कार्यालय कैलालीबाट खटेको प्रहरीको संयुक्त टोलीले गोदावरी नगरपालिका–२ अत्तरिया बजारबाट तीनै जनालाई पक्राउ गरेको हो ।
पक्राउ पर्नेमा डोटी जोरायल गाउँपालिका–४ का ३१ वर्षीय किरण पुन, आदर्श गाउँपालिका–५ का ३५ वर्षीय वीरबहादुर धामी र सोही ठाउँका २१ वर्षीय योगेन्द्र धामी रहेका छन् ।
अत्तरियाको मिट प्वाइन्ट होटलबाट किरन पुनलाई एक थान छाला, हड्डी दुई थानसहित पक्राउ गरिएको थियो । अनुसन्धान गर्ने क्रममा थप दुई जनालाई पक्राउ गरेको जिल्ला प्रहरी कार्यालयका प्रवक्ता प्रतीक विष्टले जानकारी दिए । पक्राउ परेका व्यक्ति र बरामद छाला, हड्डी आवश्यक कारबाहीका लागि डिभिजन वन कार्यालयलाई बुझाइएको छ ।
