गृहमन्त्री रामबहादुर थापा ‘बादल’ लगायतका मन्त्रीहरूलाई भेटेर प्रधानमन्त्री केपी शर्मा ओली मन्त्री निवासबाट निस्किएका छन् । गृहमन्त्री बादललाई भेट्न पुल्चोकस्थित मन्त्रीनिवास पुगेका प्रधानमन्त्री ओली केहीबेर अघि मन्त्री निवासबाट बाहिरिएका हुन् ।
भेटमा स्वास्थ्य तथा जनसंख्या मन्त्री भानुभक्त ढकाल र भौतिक पूर्वाधार तथा यातायात मन्त्री वसन्त नेम्वाङ पनि सहभागी भएका थिए । पार्टीका अर्का अध्यक्ष पुष्पकमल दाहाल ‘प्रचण्ड’लाई उनकै निवास खुमलटारमा भेटेर ओली गृहमन्त्री थापालाई भेट्न गएका थिए ।
नेकपाभित्र चर्किएको विवाद समाधान हुन नसकिरहेको बेला शीर्ष नेताहरूबीच भेटवार्ता तीव्र भएको छ । ओली फर्किएपछि खुमलटारमा वरिष्ठ नेता माधवकुमार नेपाल र उपाध्यक्ष वामदेव गौतमसँग प्रचण्डले छलफल गरिरहेका छन् ।
नेकपा स्थायी कमिटी बैठकले संवैधानिक परिषद् सम्बन्धी अध्यादेश फिर्ता लिने निर्णय गरेपनि ओलीले फिर्ता नलिएपछि विवाद चर्किंदै गएको छ ।
