अमेरिकाका नियामकहरू र ४० जना महान्यायाधिवक्ताहरूले फेसबूकविरुद्ध लामै कानूनी लडाइँ लड्नका लागि कम्मर कसेका छन् ।
न्युयोर्ककी महान्याधिवक्ता लेइटिटिया जम्सले फेसबूकविरुद्ध दुईवटा मुद्दा दायर गरेकी छन् । उनले साना प्रतिस्पर्धीलाई कुल्चिने गरी प्रभुत्व तथा एकाधिकार जमाउने, प्रतिस्पर्धा गर्न नदिने र प्रयोगकर्तालाई दाउमा राख्ने काम गरेको आरोप फेसबूकमाथि लगाएकी छन् ।
फेसबूकले प्रतिस्पर्धीलाई किन्न वा मार्नका लागि व्यापक मात्रामा डेटा र पैसा उपयोग गरेको उनले बताइन् । फेसबूकले ह्वाट्सयाप र इन्स्टाग्राम बेच्नका लागि अदालतले आदेश नदिउन्जेल थकाइ नमार्ने उनले बताइन् ।
संघीय व्यापार आयोगले पनि फेसबूकको एकाधिकारविरुद्ध एक मुद्दा दायर गरेको छ । प्रतिस्पर्धी इन्स्टाग्रामलाई सन् २०१२ मा एक अर्ब डलर तिरेर मार्क जकरबर्गले किनेको आरोप उसले लगाएको छ ।
यो मुद्दा सफल भएर फेसबूकले ह्वाट्सयाप र इन्स्टाग्राम बेच्न परेछ भने सन् १९८४ पछि पहिलोपटक ठूलो कर्पोरेसनलाई टुक्रिनका लागि बाध्य बनाइएको हुनेछ । त्यतिखेर एटीयान्डटी कम्पनीलाई साना टेलिकम्युनिकेसन कम्पनीहरू बेच्न आदेश दिइएको थियो ।
जकरबर्गले आफ्नो साम्राज्य कायम राख्न लडाइँ लडिरहने भनी कर्मचारीहरूलाई बताएका छन् । ‘सरकारको आरोपप्रति हाम्रो विमति छ र हामी अदालतमा यसविरुद्ध लड्नेछौं,’ उनले भने । ‘हामी अन्य सेवाप्रदायकसँग प्रतिस्पर्धा गरिरहेका छौं र हामी स्वच्छ प्रतिस्पर्धा गर्ने गर्छौं ।’
