कार्तिक २६ काठमाडौँ । त्रिभुवन विश्वविद्यालयले कोरोना महामारीका रोकिदै आएको परीक्षाहरु आगामी मंसीर २८ गतेबाट सञ्चालन गर्ने भएको छ । विश्व विद्यालयले आज रुटिन सार्वजनिक गरेको छ । विद्यार्थीहरुले घर पायकबाट पनि परीक्षा दिन पाउने व्यवस्था गरिएको छ ।
त्रिवि परीक्षा नियन्त्रण कार्यालयले परीक्षा सञ्चालनका लागि समय तालिकासमेत प्रकाशित गरेको छ । विज्ञान तथा प्रविधि अध्ययन संस्थान, व्यवस्थापन र शिक्षाशास्त्र संकायको परीक्षा तालिका सार्वजनिक गरिएको हो ।
चारवर्षे बीएससी, बीबीएस र बीएड चौथो वर्षको नियमित तथा आंशिक परीक्षा सञ्चालन गर्न लागिएको हो । मंसिर २८ गते बिहान ८ बजेबाट परीक्षा सञ्चालन गरिने कार्यालयले जनाएको छ ।
परीक्षा नियन्त्रण कार्यालयमार्फत सञ्चालन हुने परीक्षामा सहभागी हुने परीक्षार्थी एक लाख छन् ।
त्रिविकै आंगिक र सम्बन्धनमा सञ्चालित क्याम्पसमा परीक्षा केन्द्र तोकेर स्नातक र स्नातकोत्तर तहको परीक्षा लिइने शिक्षाध्यक्ष कार्यालयले जनाएको छ । सरकारले परीक्षा सञ्चालन गर्न रोक लगाएका कारण गत चैत ७ गतेदेखि त्रिविका परीक्षा रोकिएका थिए ।
