बझाङ, २० असोज । बझाङमा बलात्कारको घटना गाउँमै मिलाएको आरोपमा ६ जना पक्राउ परेका छन्। बझाङको मस्टा गाउँपालिकामा गत साउन २६ गते १३ वर्षीया बालिकामाथि भएको बलात्कारको घटना गाउँमै ढाकछोप गरेको भन्दै प्रहरीले उनीहरुलाई पक्राउ गरेको हो।
पक्राउ पर्नेमा लालबहादुर बोहरा, धनचढी बोहरा, झलक दमाई, थमकला दमाई, पिरु दमाई र गल्फे बोहरा छन्। १२ वर्षीया सम्झना कामीको बलात्कारपछि हत्या गरेको भन्दै पक्राउ गरिएका राजेन्द्र बोहरा यो घटनामा संलग्न थिए।
प्रहरीका अनुसार पक्राउ परेका ६ जनाले बोहरालाई गर्भ रहे जिम्मा लिने कागज गराएर पाँच सय जरिवाना तिराई घटना गाउँमै गुपचुप मिलाएका थिए। उनीहरुमाथि थप अनुसन्धान भइरहेको प्रहरीले जनाएको छ।
