पोखरा, ३ साउन । कुकुरको हत्या गरेको आरोपमा कास्कीमा प्रहरीले एकजानालाई पक्राउ गरेको छ । माछापुच्छ्रे गाउँपालिका वडा नं ४ लाहचोकमा भिरबाट कुकुरलाई खसालेर हत्या गरेको आरोपमा स्थानीय सुवास नेपाली पक्राउ परेका हुन् ।
प्रहरीका अनुसार कुकुरलाई भिरबाट खसालेको दृश्य उनले टिकटकमा समेत अपलोड गरेका थिए । सामाजिक सञ्जालमा भिडियो पोस्ट भएपछि नेपालीलगायत घटनामा संलग्नहरुलाई कारबाहीको माग गर्दै पशु कल्याण संघ नेपालले जिल्ला प्रहरी कार्यालय कास्कीमा मुद्दा दर्ता गरेको छ ।
उनले पशुलाई निर्दयीतापूर्वक भीरमा लगी निर्दयी रुपले फाली मारेर मुलुकी अपराध संहिता ऐन २०७४ को दफा २९० को विपरीत कार्य गरेको हुँदा निजलाई यथाशीघ्र कारवाही गरिनुपर्ने पशु कल्याण संघले विज्ञप्तिमा उल्लेख गरेको छ ।
