जिल्ला प्रशासन कार्यालय डडेल्धुरामा शुक्रबार बसेको कोभिड–१९ जिल्ला संकट व्यवस्थापन केन्द्रको बैठकले भदौ ३१ गतेसम्मका लागि दोश्रो पटक निषेधज्ञा गर्ने निर्णय गरेको जिल्ला प्रशासन कार्यालय डडेल्धुराले जनाएको छ । यो भन्दा पहिले भदौ १२ गते देखी १९ गतेसम्म निषेधज्ञा गरिएको थियो ।
भदौ १९ गते राति १२ बजेदेखी जारी हुनेगरी भदौ ३१ गतेसम्म जिल्लामा संचालित सार्वजनिक,नीजि सवारी साधनहरु(मोटरसाइकल) समेत जोर विजोर प्रणालीमा संचालन गर्नुपर्ने, सवारी पास विना अन्य जिल्लाबाट डडेल्धुरा जिल्लामा आउने सवारी साधनहरुलाई जिल्ला प्रवेशमा रोक लगाउने जस्ता निर्णय भएको सहायक प्रमुख जिल्ला अधिकारी बाबुराम अर्यालले बताउनुभयो ।
प्रहायक प्रमुख जिल्ला अधिकारी अर्यालका अनुसार जिल्लामा हुने सार्वजनिक मेला,पर्व,भेला लगायतका सभा सम्मेलनलाई पुर्णरुपमा निषेध गरिएको छ भने अत्यावश्यक वस्तुका पसलहरु बाहेक अन्य सवैखाले पसलहरु विहान ६ बजेदेखी बेलुका ७ बजेसम्म खुल्न सक्ने भएका छन् ।
जिल्ला संकट व्यवस्थापन केन्द्रले गरेका निर्णय उल्लङ्घन गर्नेलाई संक्रामक रोग ऐन,२०२० तथा प्रचलित कानुन अनुसार कारवाही गरिने समेत जिल्ला प्रशासन कार्यालय डडेल्धुराले जनाएको छ ।
