कञ्चनपुर- कञ्चनपुरको कृष्णपुर नगरपालिका–२ बाणीकी २५ वर्षीया राजमती रानाले आज दिउसो सेती प्रादेशिक अस्पताल धनगढीमा तिम्ल्याहा छोरीलाई जन्म दिएकी छन् । रक्तश्राव पछि आज दिउसो १२ बजे धनगढी ल्याइएकी राजमतीको अस्पतालको प्रसुती बिभागको टीमले शल्यक्रिया गरी तीन छोरीलाई बाहिर निकालेको हो ।
प्रसुती बिभागका प्रमुख प्रसुती तथा स्त्री रोग बिशेषज्ञ डा. खगेन्द्रराज भट्ट, डा. सलिना खड्का, डा. अञ्जना शर्मा र बेहोस गर्ने टीमका डा. कपिल गौतम र नियमराज न्यूरो र तीन जना नर्स सहितको टीमले करीव एक घण्टाको प्रयासमा राजमतीको शल्यक्रिया सफल भएको थियो ।
राजमतीको पहिलो सन्तान एक हजार चार सय ग्राम, दोस्रो एक हजार दुईसय ग्राम र तेस्रो सन्तानको तौल एक हजार तीन सय ग्राम रहेको डा. भट्टले बताए ।
डा. भट्टले पश्चिम टुडेलाई दिएको जानकारी अनुसार सुत्केरी र तीनै नवजात शिशुको स्वासथ्य ठिक छ । तिनै जनालाई एनआईसियुमा राखिएको छ ।
राजमतीले यसअघि पनि छोरीलाई जन्म दिएकी थिईन । छोराको आस गरेकी राजमती छोरी नै भएको थाह पाउदा अवेसम्म रोईरहिन ।
चिकित्सकहरुले निकै सम्झाएपछि उनी शान्त भएकी थिईन । उनले आठौ महिनामा तीन सन्तानलाई जन्म दिएकी हुन् ।
