भिडको दबाबबाट नख्खु कारागारबाट रिहा भएका रास्वपा सभापति रवि लामिछानेपछि देशभरका कारागारका कैदीहरूले आफूहरूले पनि भाग्न पाउनुपर्ने भन्दै रडाको मच्याउन थालेका छन् । मंगलबार लामिछानेको रिहाइपछि नख्खु जेलमा प्रदर्शनकारीले आगो लगाए । त्यसपछि झिटीगुन्टा बोकेर कैदीहरू भागे । अहिले कारागार मात्रै बाँकी छ, कैदीबन्दी छैनन् ।
अन्य कैदीबन्दीलाई छोड्नु नपरोस् र सुरक्षा स्थिति नबिग्रियोस् भनेर कारागार प्रशासनले रविलाई परिवारको जिम्मा लगायो । पत्रमा पहिला २३ भदौको मिति लेखिए पनि पछि सच्याएर २४ भदौको बनाइएको छ । प्रशासनको सो कदम प्रत्युत्पादक बन्यो । नछोडौँ जेलमा नै जलेर मर्ने पिर, छोडौँ देशभर कैदीको आन्दोलन उठेको छ, यो अर्को चिन्ताको विषय भएको छ प्रशासनलाई ।
अहिले डिल्लीबजार कारागारका कैदीले सोही कारण देखाउँदै निहुँ खोजिरहेका छन् । उनीहरूले कारागारमा रहेका सामान बाहिर ल्याएर जलाउन थालेपछि र भाग्न खोजेपछि नेपाली सेनाले सुरक्षा घेरामा राखेको छ । कैदीहरूलाई सेनाले स्थानान्तरण गरिरहेको छ ।
नख्खुको यो घटनालगत्तै रौतहटको गौर, कपिलवस्तुको तौलिहवा र बझाङका कारागारहरूमा पनि विद्रोह भयो । रौतहटबाट २६०, कपिलवस्तुबाट ४३५ र बझाङबाट ६५ कैदीबन्दी भागे । कपिलवस्तुमा त कैदीहरूले जिल्ला अदालतमा समेत आगजनी र तोडफोड गरेका छन् । सुन्धारा कारागारबाट ३ हजार ३ सय कैदी भागेका छन् । उनीहरूलाई यो आत्मविश्वास लामिछानेको रिहाइपछि नै आएको हो ।
अहिले देशभर कर्फ्यु जारी छ र सडकमा सेना परिचालन भएको छ । हजारौँको संख्यामा भागेका कैदीबन्दीलाई पुनः नियन्त्रणमा लिनु र समाजमा शान्ति सुरक्षा पुनर्स्थापना गर्नु अब सुरक्षा निकायका लागि मुख्य चुनौती भएको छ । मंगलबार रातभरजसो लुटपाट र अशान्ति मच्चिएको छ । रातको समय हुने सुरक्षा खतरा झनै बढेको छ ।
रविलाई जेलबाट निकालिएपछि देशभरका जेल ब्रेक भएका र अपराधीहरू समाजमा फर्केर आतंक सिर्जना भएको भन्दै जेन–जीले आपत्ति जनाएका छन् । – Shilapatra
