वर्षाका कारण स–साना नदीमा आकस्मिक बाढीको जोखिम
काठमाडौं – सुदूरपश्चिम प्रदेशसहित देशका विभिन्न स्थानमा वर्षा भइरहेकाले सतर्कता अपनाउन जल तथा मौसम विज्ञान विभागले आग्रह गरेको छ।
पछिल्लो एक घण्टामा लम्जुङको राइनासटार केन्द्रमा ११५।६ मिलिमिटर भारी वर्षा मापन गरिएको विभागले जनाएको छ। यस्तै, सुदूरपश्चिमको डोटीमा १६.२ मिलिमिटर र बझाङको थलारामा ११.८ मिलिमिटर वर्षा भएको छ।
त्यस्तै, गोरखाको आरुघाटमा १७.१, स्याङजामा १४.२ र सिन्धुपाल्चोकमा १५.२ मिलिमिटर वर्षा मापन गरिएको छ। राजधानी काठमाडौं आसपासमा पनि हल्का वर्षा भइरहेको छ।
विभागका अनुसार गण्डकी, कर्णाली र सुदूरपश्चिम प्रदेश हुँदै बहने स–साना नदीमा आकस्मिक रूपमा बहाव बढ्न सक्ने भएकाले मध्यम जोखिमको सम्भावना रहेको छ। विभागले नदी किनार र तलतिर बसोबास गर्नेहरुलाई विशेष सतर्कता अपनाउन आग्रह गरेको छ।
