असिम पौडेल ,पोखरा/ पोखरामा कोरोना संक्रमणबाट थप १ महिलाको मृत्यु भएको छ । पोखरा महानगरपालिका-२ निवासी ५८ वर्षीया कोरोना संक्रमित महिलाको विहीबार बिहान मृत्यु भएको हो । पुस १५ गते कोरोना संक्रमण पुष्टि भई पोखराको फिस्टेल अस्पतालमा उपचाररत महिलाको उपचारकै क्रममा आज (विहीबार) बिहान मृत्यु भएको गण्डकी प्रदेश स्वास्थ्य निर्देशक बिनोदबिन्दु शर्माले बताएका छन् । उहाँमा अन्य दीर्घरोग समेत रहेको बताइएको छ । यो सँगै गण्डकी प्रदेशमा कोरोना संक्रमणबाट मृत्यु हुनेको संख्या १९२ पुगेको छ ।
