धनगढी । सुदूरपश्चिम प्रदेश ट्राफिक प्रहरी कार्यालय अत्तरियालाई गोदावरी नगरपालिकाले गोप्रो क्यामेरा र डमी ट्राफिक प्रहरी हस्तान्तरण गरेको छ । बुधबार एक कार्यक्रमका बिच गोदावरी नगरपालिकाका नगरप्रमुख हरी सिं साउँदले प्रदेश ट्राफिक प्रहरी कार्यालयका प्रमुख तथा प्रहरी उपरिक्षक बामदेव गौतमलाई ५ वटा गोप्रो क्यामेरा र ५ वटा डमी ट्राफिक प्रहरी हस्तान्तरण गरेका हुन ।
हस्तान्तरण कार्यक्रममा बोल्दै नगरप्रमुख साउँदले पछिल्लो समयमा ट्राफिक प्रहरीले अत्तरिया क्षेत्रमा सवारी साधन व्यवस्थापनमा गर्नमा राम्रो काम गरिरहेको बताउदैं यसलाई थप व्यवस्थित बनाउन गोप्रो क्यामेरा र डमी ट्राफिक प्रहरी हस्तान्तरण गरेको बताए ।
यस्तै प्रदेश ट्राफिक प्रहरी कार्यालयका प्रमुख गौतमले ट्राफिक व्यवस्थापनका लागि अति आवश्यक सामाग्री सहयोग गरेको प्रति नगरपालिकालाई धन्यावाद व्यक्त गरे । नगरपालिकाबाट प्राप्त सामग्रीले गोदावरी नगरपालिका अन्तर्गत पर्ने राजमार्ग तथा अन्य सडक क्षेत्रको ट्राफिक ब्यवस्थालाई चुस्त दुरुस्त राख्न सहज हुने उनले बताए ।
