बैतडी, २५ मंसिर । बैतडी जिल्लाको डिलाशैनी गाउँपालिका वडा नम्बर ६ सेटिगाउँमा नवजात शिशुको शव भेटिएको छ ।
बुधबार दिउँसो स्थानीयहरुले सेटिगाउँ नजिकै मृत अवस्थामा शिशुको शव देखेपछि प्रहरीलाई खबर गरेको बैतडीका प्रहरी प्रमुख डिएसपी नारायणप्रसाद अधिकारीले जानकारी दिए ।
मृतक शिशुको शव माथिबाट ढुङ्गाले ढाकेको अवस्थामा भटिएको प्रहरीले जनाएको छ । शिशुको शवको बाहिरी भागमा कुनैपनि चोटपटक नभएको र कसैले गर्भपतन गराएर फालेको हुनसक्ने प्रहरीले अनुमान गरेको छ ।
घटनाको अनुसन्धानका लागि इलाका प्रहरी कार्यालय पाटनबाट प्रहरी निरीक्षक धनदेव साउँद नेतृत्वको प्रहरी टोली घटनास्थलमा पुगेको छ ।
नवजात शिशु कसले किन फाल्यो भन्नेबारे केहि नखुलेको र अनुसन्धान जारी रहेको बैतडी प्रहरीले जानकारी दिएको छ ।
