बैतडीमा हालै भएको बस दुर्घटनाको पीडा सेलाउन नपाउँदै बैतडीमा पुनः अर्को ठूलो दुर्घटना भएको छ । बैतडीको खोड्पे बजार नजिक दुई साताअघि भएको बस दुर्घटनामा नौ जनाले ज्यान गुमाएका थिए ।
दार्चुलाबाट यात्रु लिएर महेन्द्रनगरतर्फ जाँदै गरेको पवनदुत यातायात प्रालिको बस खोड्पे बजार नजिक मोडबाट खस्दा नौ जनाले ज्यान गुमाए, दुर्घटनामा ३४ जना घाइते भए ।
चालकले मोडमा बस नियन्त्रण गर्न नसक्दा दुर्घटना भएको थियो । नौ जनाको ज्यान जाने गरी भएको यो दुर्घटनाको केही दिनमै बैतडीमा अर्को ठूलो दुर्घटना भएको छ ।
बैतडीको दशरथचन्द नगरपालिका–१०, मा मंगलबार बोलेरो जीप दुर्घटना हुँदा पाँच जनाको मृत्यु भएको छ भने चार जना घाइते भएका छन् ।
झुलाघाटबाट गोठलापानी जाँदै गरेको बुड्डा भन्ने स्थानमा दिउँसो दुर्घटनामा परेको हो । दुर्घटनामा परेर मृत्यु भएका सबै नागरिक भारतबाट पेन्सन बुझेर घर फर्कदै थिए । भारतीय सरकारी निकायमा काम गरेका नेपालीलाई पेन्सन बुझ्न सजिलो होस् भनेर स्थानीय प्रशासनले झुलाघाट नाका पाँच दिनका लागि खुला गरेको थियो ।
नाका खुलेपछि सिमा पारीबाट पेन्सन बुझेर घर फर्कदै गरेकाहरु बोकेको जीप दुर्घटनामा परेको हो । सुदूरपश्चिममा सवारी दुर्घटना वर्षेनी बढ्दो छ । दुर्घटनासँगै दुर्घटनामा ज्यान गुमाउने र अंगभंग हुनेको संख्या पनि बढीरहेको छ । करिब तीन वर्षयतामात्रै प्रदेशका नौ जिल्लामा भएका दुर्घटनामा पाँच सय ९९ जनाले ज्यान गुमाएका प्रहरीको तथ्यांक छ ।
आर्थिक वर्ष २०७४/०७५ देखि हालसम्म भएका आठ सय ५८ वटा दुर्घटनामा नौ सय ५९ जनाजनाभन्दा बढी गम्भीर घाइते भएका छन् । ठूला दुर्घटनाहरु पहाडी जिल्लामा बढी हुने गरेका छन् ।
ट्राफिक प्रहरीका अनुसार क्षमताभन्दा बढी यात्रु बोक्ने, तीव्र गति, सडकको दुरावस्ताजस्ता कारणले पहाडी जिल्लामा हुने दुर्घटनाको कारण रहने गरेको छ ।
पहाडी जिल्लामा तीव्र गति, साँघुरा सडक, यान्त्रिक गडबडी र मानवीय त्रुटिले दुर्घटना हुने गरेको छ । क्षमताभन्दा बढी यात्रु बोक्नुले पनि दुर्घटनाहरु हुने गरेका छन् ।
पहाडी जिल्लामा सडक साँघुरको छ । कतिपय ठाउँमा एक लेनको सडक छ । प्राविधिकसँगै मानवीय कारणले पनि दुर्घटना बढेका छन् । बढ्दो दुर्घटनाले धनजनको ठूलो क्षति भइरहेको छ ।
दुर्घटना न्यूनिकरणका लागि राज्यसँगै सरोकारवाला सबैले ध्यान दिनुपर्छ । यसमा ट्राफिक प्रहरीको भूमिका अझ बढी हुनुपर्छ ।
क्षमताभन्दा बढी यात्रु बोक्न नदिने, गति नियन्त्रण गर्ने, ट्राफिक नियमितको पालना गराउनेजस्ता विषयमा कडाइका साथ कार्यान्वयन गर्नसके मानवीय त्रुटिका कारण हुने दुर्घटनाहरु न्यूनिकरण गर्न सकिन्छ
