काठमाडौं – कोरोना भाइरसको संक्रमण विरुद्धको खोप परीक्षण नेपालमा सुरु गर्न लागिएको छ ।
नेपालमा पनि कोरोना भाइरसको खोप परीक्षण सुरु गर्न लागिएको स्वास्थ्य तथा जनसंख्या मन्त्रलायका प्रवक्ता डा. जागेश्वर गौतमले बताएका हुन् ।
चीन, रसिया र यूके अक्सफोर्डको खोप ग्रुपले उत्पादन गरेको खोप नेपालमा तेस्रो क्लिनिकल ट्रायल गर्न उक्त कम्पनीहरु इच्छुक भएको हुँदा प्रक्रिया अगाडि बढाइएको मन्त्रालयले जनाएको छ ।
नेपालमा कोरोना भाइरसको खोप प्रमाणित नभइ खोप परीक्षण गर्न नहुने विज्ञहरुले सुझाए पनि मन्त्रालयले परीक्षणको तयारी थालेको हो । विज्ञहरुले नेपालजस्तो विकाशील मुलुकमा कोरोनाविरुद्धको खोप परीक्षण गर्दा यसले उत्पन्न गर्ने असरहरुको बारेमा ग्यारेन्टी गर्ने निकाय नहुँदा समस्या हुने बताएका छन् ।
परीक्षणमा स्व:स्फूर्त रुपमा सहभागी हुन चाहनेलाई मात्रै परीक्षण गरिने जनाइएको हो ।
त्यसैगरी अमेरिका, बेलायत र भारतलगायतका मुलुकमा सफल मानिएको रेम्डेसिभिर औषधी र कोभ्याक्सिनको पनि प्रयोग सुरु गरिएको मन्त्रालयले जनाएको छ ।
