डडेल्धुराः डडेल्धुराको नवदुर्गा गाउँपालिकामा खाद्य सुरक्षा लाई मध्यनजर गथरि गाउँमा रहेका बजार अनुगमन गरिएको छ । पहिलो दिन आइतबार पालिकाको वडा नम्बर १ का बजारमा अनुगमन गरिएको हो । गाउँपालिकाका उपाध्यक्ष निर्मला बोगटीको नेतृत्वमा भएको अनुगमनमा म्याद सकिएका र लेबल नभएका अखाद्य सामान भेटिएका छन् । गाउँपालिकाका उपाध्यक्ष बोगटीले बजार अनुगमनको क्रममा म्याद सकिएका र लेबल नभएका अवैध सामान फेला पारेर नष्ट गरिएको जानकारी दिइन् ।
अनुगमनका क्रममा केही व्यापारीहरुले व्यवसायी दर्ता, नविकरण, मूल्य सूची र बिलजस्ता कुराहरु लागू नगरेको पाइएको बताउँदै उपाध्यक्ष बोगटीले भनिन्, ‘व्यापारीलाई म्याद गुज्रेका सामाग्री बिक्री नगर्न र उपभोक्तालाई उपभोग्य मिति तथा लेबल हेरेर मात्र खरिद गर्न आग्रह गरिएको छ ।’
यस्तै अनुगमनकै क्रममा नवदुर्गा गाउँपालिका वडा नम्बर १ का केही व्यापारीले मदिरासमेत बिक्री गरिरहेको भेटिएको छ । नवदुर्गा गाउँपालिकामा मदिरा निषेध गरिएको जानकारी दिँदै उपाध्यक्ष बोगटीले दुई पसलबाट मदिरा पनि बरामद गरेर प्रहरीको जिम्मा लगाएको जानकारी दिइन् । उनका अनुसार पहिलो दिन वडा नम्बर १ का असुर्पा, चोरा लगायतका आधा दर्जन ग्रामिण बजारमा अनुगमन गरिएको छ भने पालिकाका अन्य चार वटा वडामा अनुगमन गर्ने तयारी छ ।
नवदुर्गा गाउँपालिका वडा नम्बर १ का अध्यक्ष शेरबहादुर साउँदले बजार अनुगमनलाई निरन्तरता दिने जानकारी दिए । ‘कालोबजारी नियन्त्रण गर्ने, म्याद गुज्रेका सामग्री बिक्री वितरणमा रोक लगाउने र उपभोक्ता अधिकारका विषयमा जानकारी दिने उद्देश्यले अनुगमन निरन्तर गर्ने तयारी छ,’ उनले भने ।
नवदुर्गा गाउँपालिकाको आयोजनामा भएको अनुगमनमा उपाध्यक्ष बोगटीसहित सुरक्षा निकायका प्रतिनिधि, सञ्चारकर्मी र गाउँपालिकाका विभिन्न शाखाका प्रतिनिधिको सहभागिता रहेको थियो ।
