महेन्द्रनगर – कञ्चनपुरमा शिवशिखर वहुउद्देश्यीय सहकारी संस्थामा वचतकर्ताको वचत हिनामिना गरी ठगी गरेको आरोपमा प्रहरीले ४ जनालाई पक्राउ गरेको छ ।
सो सहकारीका महेन्द्रनगर, त्रिभुवनबस्ती र बेलौरीका वचतकर्ताबाट रकम उठाएर ठगी गरेको आरोपमा संस्थाका पदाधिकारीलाई पक्राउ गरिएको कञ्चनपुर प्रहरीले जनाएको छ ।
प्रहरीका अनुसार उक्त सहकारीका पदाधिकारी गिता शर्मा, केदार नाथ शर्मा, पुस्कर मल्ल र अमिस राज भण्डारीलाई पक्राउ गरिएको हो । कञ्चनपुरमा सो सहकारीले हालसम्म ३१ करोड ९७ लाख रुपैयाँ वचत हिनामिना गरेको उजुरी प्रहरीकहाँ परेको छ ।
कूल ३ हजार ६ सय ७१ वचतकर्ताले जिल्ला प्रहरी कार्यालयमा जाहेरी पेश गरेका छन् । ती जाहेरीको आधारमा चारै जनालाई पक्राउ गरी जिल्ला प्रहरी कार्यालयको हिरासतमा राखेर अनुसन्धान भइरहेको प्रहरीले जनाएको छ ।
