डडेल्धुराः सात पालिका रहेको डडेल्धुरामा घर घरमा विजुली पुगाउने लक्ष्य राखिएकोछ । हाल डडेल्धुरा जिल्लाका २३ हजार बढी घरधुरीमा विद्युतको पहुँच पुगेको छ । ३० हजार बढी घरधुरी रहेको जिल्लाका ८५ प्रतिशत अर्थात २३ हजार बढी घरधुरीमा विद्युतको पहुँच पुगेको हो । नेपाल विद्युत प्राधिकरण डडेल्धुरा वितरण केन्द्रले जानकारी दिएको छ ।
शतप्रतिशत घरधुरीमा विद्युतिकरण पुगाउनका लागि ४५ करोड बराबर रकमको टेण्डर हुन लागेको कार्यालय प्रमुख रमेश अवस्थीले जानकारी दिएका छन् । चालू आर्थिक वर्षमा काम गर्न केन्द्रीय कार्यालय मार्फत टेण्डर हुन लागेको उनको भनाई छ । करिब ६० लाख बराबरका ८ वटा टेण्डर सम्पन्न हुने चरणमा रहेको समेत उनले बताए ।
परशुराम नगरपालिका–२ लगायतका केही गाउँमा विद्युत विस्तार हुन सकेको छैन भने नवदुर्गा गाउँपालिकाको १, २ र ४ वडाका गाउँमा पनि विद्युतिकरण हुन बाँकी छ । केही स्थानमा ठेकेदारको लापर्वाहीका कारण विद्युतीकरणमा ढिलाई भएको उनले बताए ।
उनका अनुसार नवदुर्गा गाउँपालिका–४, परशुराम नगरपालिका–३ लगायतका गाउँमा चालू आर्थिक वर्षको सुरुवातमै विद्युतिकरण भएको छ । बाँकी रहेका सबै गाउँमा विद्युतिकरणका लागि नयाँ ठेक्का आह्वान गरिन लागेको उनले बताए ।
