डडेल्धुरा – कैलालीको मोहन्याल गाउँपालिका अध्यक्ष देवीदत्त उपाध्यायले ‘श्रमदान महाअभियान’ शुरू गरेका छन् । ‘म बनाउँछु मेरो मोहन्याल’ नारा दिएर शुरू गरिएको अभियान आगामी आर्थिक वर्षको नीति तथा कार्यक्रममा समेत समावेश गरिने उनले बताए ।
‘म बनाउँछु मेरो मोहन्याल मूल नाराका साथ श्रमदान महाअभियान आव २०८०।०८१ को नीति तथा कार्यक्रममा समेत प्राथमिकताका साथ आउनेछ,’ उनले सामाजिक संजाल फेसबुक मार्फत सार्वजनिक गरेका छन ।
फेसबुकमा गिट्टि कुट्दै गरेको फोटा सहित स्टेटस हालेका उनले देखाउन मात्र नभई मोहन्याल बनाउने उद्देश्यले अभियान शुरू गरिएको उनले बताएका छन । उक्त अभियान अन्तरगत साताको एक दिन सबै जनप्रतिनिधिले अनिवार्य श्रमदान गर्नेगरी योजना बनाइने उनले बताएका छन । आफू सातामा एक दिन प्रत्येक वडामा श्रमदानमा जाने उनले जानकारी दिए ।
उनले आफैंबाट अभियानको थालनी गरेका छन् । उनले वडा नम्बर ४ स्थित शान्तिपुर खानेपानी योजनामा श्रमदान गरेर अभियानको शुरूआत गरेका हुन् ।
