डडेल्धुरा – सामाजिक सञ्जाल फेसबुकमा जथाभावी लेखेर पत्रकारको चरित्र हत्या गरेको आरोपमा डडेल्धुरामा एक जना पक्राउ परेका छन् । पक्राउ पर्नेमा अमरगढी नगरपालिका वडा नम्बर १ मालमका सुरत तमोली रहेको प्रहरीले जनाएको छ ।
पत्रकार महासंघ डडेल्धुराले निवेदन दिएपछि उनलाई सोधपुछका लागि नियन्त्रणमा लिएको जिल्ला प्रहरी कार्यालय डडेल्धुराका प्रमुख प्रहरी नायब उपरीक्षक मनोहर भट्टले जानकारी दिए ।
पत्रकारको आत्मसम्मानमा ठेस पुग्ने र मानहानी हुने किसिमले पटकपटक स्टाटस लेख्ने र पत्रकारलाई असुरक्षित बनाउने कार्य निरन्तर गर्दै आएकाले कानूनी कारबाहीको मागसहित महासंघले निवेदन दिएको थियो ।
तमोलीले यसअघि पनि पटकपटक जिल्लामा कार्यरत पत्रकारको चरित्र हत्या गर्ने गरी सामाजिक सञ्जालमा स्टाटस हाल्दै आएका थिए ।
