द्बार खुलिया देबताका दैला खुल्या माईका।
अम्मा अरि डाको लाउना बाच्चा कैलु गाईका।।
साउन बाईग्यो झल्का लाइग्यो ओल्केत्यार आईग्यो।
सन्जा गोरा: महेश्वरको रङ्गित्यार आइग्यो।।
महतारि रोस्याका कुन्टा भात पकाउन गैन।
गाबा हालि भादलाइनो झम्पुकि भुटाइन।।
मथौतो कुर्याकि दैका कटौरिमा भाग।
बुणि: बाड्ड गेदानकि होइगै लागालाग।।
ठाङरा काकणि बेलि पोलिखानाभ्या् घोगा।
रोपो नेलाइ धान्कि सेरि मुख भरि पोका।।
ढम्मढम्म ढोल बजिग्या गोरा:का खलामा।
सुन्तला मौसमि दानी झुलिग्या डालामा।।
धिनालि अणकन लागि रिथनिकि आस।
गोगनकि मनानि रिटि मगमगानि बाँस।।
ठाणाखेल धुमारि फाग हल्लरि कल्लरि।
नसिजान्नि गोरा:ल्याउन कन्या चेलिछोरि।।
ठकाठक- ठकाठक देउडाकि रहर।
मनकि मलमलि रैगै सुर्ता माणि क्यार??
झल्का लगाई जान्याहैकि सतहत्तर साल?
हौसियाकि सम्झनाले रोइरोइ आखि लाल।।
भलिसिष खरि तीस मुखेउणाका साथ।
यिसाइ जान्या हुन्कि साईबौ ऐल गोरा:जाँत।।
लेखक केशब पाण्डेय आँशु ( भागेश्वर ,डडेल्धुरा )
