डडेल्धुरा(दिपक राज भट्ट)ः डडेल्धुराको बाघखोरमा (सदरमुकाम)मा आज बाघ जात्रा निकालिएको छ। अमरगढी नगरपालिका–५ स्थित बाघखोरमा बाघ जात्रा निकालिएको हो। पछिल्लो ३ बर्ष कोरोना संक्रमणको महामारीका कारण बाघ जात्रा नभएकोमा यसवर्ष खलंगा जात्रा संरक्षण समितिले बाघ जात्रा निकालेको हो।
समितिका संयोजक श्याम सिनालका अनुसार जात्रामा बाघ, राजारानी, आर्मी, शिकारीलगायतको अभिनय गरिएको छ। तत्कालीन बडाहाकिमलाई जाहेरी गर्ने र वडाहाकिमले बाघ मार्न आदेश दिने जस्ता प्रसंगलाई समेटेर स्थानीयले बाघजात्रा प्रदर्शन गर्ने गरेको उनले बताए।
तत्कालीन समयमा डडेल्धुरा सदरमुकाम बाघखोर तथा वरपरको बस्तीमा बाघको आतंक हुने र बाघको भयबाट बच्न बाघलाई खोरमा हाल्ने योजना अनुरुप हालको बजार क्षेत्रमा खोर बनाई बाघलाई थुन्ने गरेको सम्झनामा यो जात्रा मनाइँदै आएको छ।
