एजेन्सी
विश्वको जनसंख्या सात अर्ब ८० करोड, सबैभन्दा धेरै चीनमा, भारत दोस्रो र अमेरिका तेस्रोमा
न्यूयोर्क । विश्वको जनसंख्या सात अर्ब ८० करोड पुगेको छ । अमेरिकी तथ्यांक व्यूरोका अनुसार सात करोड ४० लाखले बढेर विश्वको जनसंख्या सात अर्ब ८० करोड पुगेको हो ।
विश्वमा भएको जनसंख्यामा चीनमा सबैभन्दा धेरै जनसंख्या छ । चीनकोे जनसंख्या एक अर्ब ४० करोड छ । चीनपछि सबैभन्दा धेरै जनसंख्या भारतमा रहेको छ । चीनलाई पछ्याइरहेको भारतको जनसंख्या एक अर्ब ३८ करोड पुगेको छ ।
व्यूरोका अनुसार जनसंख्याको दृष्टिले अमेरिका विश्वकै तेस्रो ठूलो देश बनेको छ । अमेरिकाको जनसंख्या ३३ करोड २० लाख पुगेको छ । अमेरिकापछि इण्डोनेसिया र पाकिस्तान क्रमशः चौथो र पाँचौं ठूलो देश बनेका छन् ।
इण्डोनेसियाको जनसंख्या २७ करोड ५० लाख छ भने पाकिस्तानको २३ करोड ८० लाख नाघेको छ । सन् २०२१ मा विश्वको जनसंख्या शून्य दशमलव नौ प्रतिशतले वृद्धि भएको हो । समग्रमा विश्वको जनसंख्या बढे पनि वृद्धि दर भने सन् १९६० को मध्यदेखि निरन्तर घटिरहेको छ ।
व्यूरोका अनुसार आगामी केही दशक कंगो, इजिप्ट, इथोपिया, भारत, इण्डोनेसिया, नाइजेरिया, पाकिस्तान, तान्जेनिया र अमेरिकामा जनसंख्या बढ्नेछ । यो शताब्दीको अन्त्यमा ५५ देशको जनसंख्या एक प्रतिशतभन्दा बढीले घट्नेछ । राष्ट्रसंघले पनि बुल्गेरिया, लात्भिया, लिथुनिया र युक्रेनको जनसंख्या २० प्रतिशतले घट्ने जनाएको छ ।
