डडेल्धुरा- डडेल्धुरामा आफ्ना बुवाको शव जलाएर फर्किएका एक छोराको घर नपुग्दै मृत्यू भएको छ । जिल्लाको आलितालमा गाउँपालिका–५ भावरमा बस्दै आएका ७५ वर्षीय भक्तबहादुर रोकाको शव जलाएर घर फर्किने क्रममा उनका छोरा शेरबहादुरको पनि मृत्यु भएको हो।
असार ८ गते मंगलबार मृत्यु भएका भक्तबहादुरको काजक्रिया गर्न भारत बस्दै आएका उनका कान्छा छोरा शेरबहादुर बुधबार गाउँ आएका थिए ।
हेर्दा विरामी र कमजोर देखिने शेरबहादुर बुबाको अन्तिम सस्कार गरेर करिब ५० मिटर यता आउँदा अकस्मात आफैं ढलेको आफन्तहरुले बताएका छन्। समात्न जाँदा शेरबहादुरले आफन्तकै अँगालोमा प्राण छोडेको मलामी गएकाहरुले बताए ।
७५ वर्षीय बुवा र ४५ वर्षीय छोरा दुवैको एकैदिन अन्तिम त भयो काजक्रिया कसरी गर्ने मृतकका आफन्तहरु अन्यौलमा रहेका छन । घटना सुनेपछि घट्ना स्थल पुगेका आलिताल गापा– ५ का वडाध्यक्ष प्रकाशसिंह बोहराले आर्थिक सहयोगको लागि आफूले सक्दो पहल गर्ने बताए।
