कञ्चनपुर– कञ्चनपुरको कृष्णपुर नगरपालिकामा एक विद्यालय भवन शिलान्याश गरिएको छ।
नगरपालिकाको वडा नम्बर ६ बसन्तपुरमा महाकाली नमूना माध्यमिक विद्यालयको आठ कोठे भवनको शिलान्याश गरिएको हो। उक्त भवनको शिलान्याश नगर प्रमुख कर्ण बहादुर हमालले गरेका हुन्।
संघीय सरकारको बजेटबाट १ करोड २१ लाख २४ हजार ९०० रुपैयाँ लागतमा सो भवन निर्माण भइरहेको बताइएको छ। भवन निर्माणका लागि नाटेश्वरी निर्माण सेवासंग सम्झौता भएको र आगामी ३ महिनाभित्रै भवन निर्माण भइसक्ने नगरपालिकाले जनाएको छ।
त्यस्तै नगरपालिकाले विद्यालयको घेर पर्खालका लागि १५ लाख बजेट छुट्याई सो कार्य अन्तिम चरणमा रहेको बताइएको छ।
