विश्वभर फैलिएको कोरोना भाइरसका कारण विश्व नै यतिबेला आक्रान्त बनेको छ । यति वेला सबै क्षेत्र ठप्प छन् । तर तर महामारीकै बिच कैलालीका किसान धान रोपाइँमा व्यस्त हुने गरेका छन् ।
यहाँको रानी–जमरा कुलरिया सिँचाइ आयोजनाका कारण नहरमा प्रशस्त पानी आउन थालेपछि चाँडै रोपाइँ सुरु भएको किसानहरुले बताएका छन् । विगतमा पानीको असुविधाले ढिलो गरी रोपाइँ हुने भए पनि यस बर्ष भने नहरमा प्रशस्त पानी रहेकाले असार नलाग्दै रोपाइँ सुरु भएको कैलालीको जानकी गाउँपालिका–४ का किसान रामेश्वर रेग्मीले बताईन् ।
यो वर्ष गत वर्षको जस्तो रासायनिक मलको पनि समस्या नभएको र निषेधाज्ञाका कारण ढुवानीमा भने सास्ती रहेको उनको भनाई छ । टीकापुर–८ का किसान धनसिंह साउदले पानी जम्ने खल्ला खेतमा चाँडै रोपाइँ नगरे ढिलो रोप्न नसकिने भएकाले पनि चाँडै रोप्नुपर्ने र कुलामा पानी पनि प्रशस्त भएकाले रोपाइँ थालिएको बताए ।
रानी–जमरा कुलरिया सिँचाइ आयोजनाको कमान्ड एरियामा १४ हजार हेक्टर क्षेत्रफलमा सिँचाइ सुविधा पुगेको छ । करिब १० हजार हेक्टर जग्गामा धान खेती गरिँदै आएको जनाइएको छ ।
