कैलाली। कैलालीको बिभिन्न क्षेत्र बाढी प्रभावित भएका छन । विशेस गरी कैलालीको दक्षिण क्षेत्रका बाढी प्रभावितले पाँच दिनदेखि चाउचाउ र चिउराको भरमा गुजारा गरिरहेका छन्।
उनीहरुको मुखमा नियमित अन्न नपरेको पाँच दिन भइसकेको छ। बाढीको पानी पूर्णरुपमा नघटेका कारण प्रभावितहरु सडकमै बस्न बाध्य भएका छन्।
स्थानीय सरकार र केही संघ संस्थाले दिएको बिस्कुट, चाउचाउ तथा पानीको भरमा गुजारा गरिरहेको घरमा भएको अन्नपात बाढीले बगाएको र बाँकी रहेको पनि पानीले भिजेर कुहिँदा छाक टार्नै मुस्किल भएको बाढी बाढी पीडितहरुले बताएका छन्।
बाढीले जिल्लाको विभिन्न स्थानीय तहका ६ हजार ३ सय २० घरपरिवार प्रभावित भएका छन्।प्रभावितमध्ये केही परिवार बाढी घटेपछि आफ्नो घर फर्के पनि अझै अधिकांश परिवार हुलाकी सडकमा त्रिपाल मुनि बसिरहेको भजनी नगरपालिकाकी उपमेयर छाया देवकोटाले बताइन्।
बाढी प्रभावित सबैको उद्धारलाई पहिलो प्राथमितामा राखेकाले सुख्खा खानाबाहेक अन्य ब्यवस्था गर्न नसकिएको कैलालीका प्रमुख जिल्ला अधिकारी यज्ञराज वोहराले बताए।
जिल्ला प्रशासन कार्यालय कैलालीका अनुसार जोशीपुर गाउँपालिकामा २ हजार ३१५, भजनी नगरपालिकामा २ हजार १८०, जानकी गाउँपालिकामा १ हजार र टीकापुर नगरपालिकामा ८ सय २५ घरपरिवार बाढीले प्रभावित भएका छन्।
