डोटी,२९ वैशाख । कोरोना नियन्त्रण तथा रोकथामका लागि अग्रपंक्तिमा खटिने जिल्लाका १२ स्वास्थ्यकर्मीमा कोरोना संक्रमण देखिएको छ । जिल्ला स्वास्थ्य कार्यालयका परिवार नियोजन निरीक्षक सूर्य विष्टले जिल्लामा अहिलेसम्म कम्तीमा पनि १२ स्वास्थ्यकर्मीमा कोरोना संक्रमण पुष्टि भएको जानकारी दिए ।
उनका अनुसार संक्रमितमध्ये एक हेल्थ असिस्टेन्ट तथा अन्य अनमी छन् । संक्रमित स्वास्थ्यकर्मी सबैलाई होम आइसोलेसनमा राखिएका छन् । उनीहरूको अवस्था जटिल नभएको बताइएको छ ।
जिल्ला स्वास्थ्य कार्यालयका अनुसार जोरायलमा २, केआईसिंहमा ३, आदर्शमा ४, बडिकेदारमा १ तथा पूर्वीचौकी गाउँपालिकामा २ गरी १२ स्वास्थ्यकर्मीमा कोरोना संक्रमण देखिएको छ ।
स्वास्थ्यकर्मीमा कोरोना संक्रमण देखिएपछि डोटीका नागरिकलाई उपचार सेवा पाउन सकस भएको छ । कोरोना संक्रमितको उपचारमा खटिने स्वास्थ्यकर्मीलाई नै संक्रमण भएपछि अन्य बिरामीको उपचारमा समस्या भएको जिल्ला अस्पतालका फोकल पर्सन राजेन्द्र फुलाराले बताए ।
जिल्लाको जोरायल गाउँपालिका–५ गड्सेरामा रहेको इलाका स्वास्थ्य कार्यालयका २ कर्मचारीमा कोरोना संक्रमण देखिएको छ । कर्मचारीमा संक्रमण देखिएपछि स्वास्थ्य संस्थाले प्रदान गर्दै आएको आकस्मिक बाहेकका अन्य सबै सेवा बन्द गरेको अनमी विधि भण्डारीले बताइन् ।
‘संस्थामा काम गर्ने २ स्वास्थ्यकर्मीमा कोरोना पुष्टि भएको छ, आकस्मिक बाहेकका अन्य सेवा हामीले बन्द गरेका छौं,’ उनले भनिन् ।
स्वास्थ्य कार्यालयले एक सूचना सार्वजनिक गरी आगामी जेठ २ गतेसम्मका लागि आकस्मिक बाहेकका अन्य सबै सेवा बन्द गरेको जनाएको छ । स्वास्थ्य कार्यालयले सेवा बन्द गरेपछि स्वास्थ्य संस्थामा आउने दीर्घरोगी तथा सामान्य रुघाखोकी तथा ज्वरो आएका बिरामीलाई उपचारमा समस्या भएको स्थानीय बताउँछन् ।
