बैतडी, २४ बैशाख । नयाँ भेरिएन्टसहितको कोरोना संक्रमणको दोस्रो लहर फैलिएपछि जिल्ला कारागार बैतडीका कैदीबन्दीमा संक्रमणको जोखिम बढेको छ। २५ जनाको क्षमता रहेको कारागारमा हाल ७१ जना कैदीबन्दी रहेका छन्।
क्षमताभन्दा तेब्बर कैदीबन्दी हुँदा कोरोना संक्रमणको जोखिम बढेको र व्यवस्थापनमा चुनौती थपिएको जेलर अनिल तिवारीले बताए।
कारागारमा अहिले ३८ जना कैदी र ३३ जना थुनुवा छन्। भित्र बस्ने ठाउँ नभएपछि कारागारको आँगनमा टेन्ट टाँगेर बसोबासको व्यवस्था मिलाइएको जेलर तिवारीले बताए।
कोरोना संक्रमणको जोखिमलाई मध्यनजर गर्दै भेटघाटको कार्यक्रम बन्द गरिएको जेलर तिवारीले बताए। वि।सं। २०४० सालमा निर्माण गरिएको कारागार भवन पुनर्निर्माण नहुँदा जीर्ण बन्दै गएको छ।
