धनगढी । कैलालीमा निषेधाज्ञा उल्लंघन गर्ने ७५० सवारी साधनलाई लाई ‘होल्ड’ गरिएको छ । कोरोना संक्रमण न्युनिकरण गर्न जारी गरिएको निषेधाज्ञाको पहिलो दिन जिल्लाभर ठुला तथा साना ७५० सवारी साधनलाई होल्ड गरिएको हो । भने ३८ वटा सवारी साधनलाई कारवाही गरिएको जिल्ला ट्राफिक प्रहरी कार्यालय कैलालीले जनाएको छ ।
कोरोना संक्रमण बढ्दै गएपछि जिल्ला प्रशासन कार्यालयले बिहीबारदेखि जारी गरेको निषेधाज्ञा उल्लंघन हुन नदिन ट्राफिक प्रहरी र जिल्ला प्रहरी कार्यालय कैलालीबाट खटिएको प्रहरीको संयुक्त टोलीले निगरानी तथा कारवाही कडा पारेको जिल्ला ट्राफिक प्रहरी कार्यालय कैलालीका प्रमुख तथा प्रहरी निरिक्षक बिरेन्द्र बहादुर बोहराले जानकारी दिए ।
उनले निषेधाज्ञा उल्लंघन गर्ने ७५० सवारी साधनलाई लाई होल्ड गरी सम्झाई बुझाई गरिएको र ३८ वटा सवारी साधनलाई कारवाही गरिएको बताए । कारवाही गरिएका सवारी साधनबाट करिब २३ हजार ५ सय राजस्व संकलन भएको छ ।
जिल्ला प्रहरी कार्यालय कैलालीबाट खटेको प्रहरी र ट्राफिक प्रहरीको संयुक्त गस्ती टोलीले कैलाली र धनगढी आसपासका क्षेत्रमा कडाइ गरेको छ ।
