धनगढी –राष्ट्रिय युवा संघ नेपालका इन्चार्ज एबमा नेकपा एमालेका सांसद महेश बस्नेतले धनगढी पुगेर पार्टी उपाध्यक्ष भीम रावल हराएको टिप्पणी गरेका छन् ।‘मैले यहाँ भीम रावललाई देखेको छैन’ उनले भने, ‘भीम रावल हराएको सूचना गर्दछु ।’
रावल प्रति आक्रामक देखिएका बस्नेतले भने – ‘पटक-पटक अवसर पाएपछि सरकारको समर्थन गर्ने र अवसर नपाउँदा सरकारको विरोध गर्ने रावलको दोहोरो चरित्र देखाउँदै आएका छन् ।’
एमालेको संसदीय दलको बैठकमा समेत रावल नगएको भन्दै बस्नेतले अहिले पनि रावलले पार्टी विरोधी गतिविधि गरिरहेको बताए । कम्युनिस्ट आन्दोलनमा अवरोध सृजना गरेको भन्दै रावललाई एमालेमा फर्किन कठिनाइ भइरहेको बस्नेतले बताए ।
सच्चिएर आए रावललाई नेता मान्न सकिने समेत बस्नेतले बताएका थिए । बस्नेतले भने, ‘सच्चिएर आए रावललाई नेता मान्न सकिन्छ, नत्र बुढेसकालमा पछुताउनु पर्छ ।’
