अत्तरिया: विश्वव्यापि महामारीको रुपमा फैलिएको कोरोनाका कारण यस बर्ष मेला महोत्सव हुन पाएका छैनन् । जसका कारण बर्षैपिक्षे आयोजना हुँदै आएका मेहोत्सवलाई धेरैले सम्झिरहेका छन । अन्य भेला, सभा सम्मेलन संचालनमा आईसकेका भएपनि मेला महोत्सव भने यस बर्ष हुन सकेका छैनन् ।
तर, बिहिबार भने मेला महोत्सवको झल्को दिने गरी अत्तरियामा बृहत सांस्कृतिक कार्यक्रमको आयोजना गरिएको छ । महाशिवरात्रीको अवसरमा थ्रिडिभिएल क्रियसनले कार्यक्रमको आयोजना गरेको हो ।
महोत्सवको झल्को
अत्तरिया उद्योग बाणिज्य संघले बर्षेनी अत्तरियाको लामिताल परिसरमा महोत्सवको आयोजना गर्दै आएको छ । जसका कारण यस क्षेत्रका स्थानियले राष्ट्रिय तथा स्थानियय कलाकारहरु संग रमाउन पाएका हुन्थे ।यस बर्ष महोत्सव नभएपनि महोत्सवकै झल्को बृहत सांस्कृतिक कार्यक्रमले दिएको थियो ।
थ्रिडिभिएल क्रियसन युवा विद्यार्थी, युवा अभियन्ताद्धारा संचालित संस्थाले आयोजना गरेको उक्त कार्यक्रममा महोत्सव हुन नपाएर रमाउन नपाएका स्थानियले एक दिनका लागि भएपनि भरपुर मनोरञ्जन निल पाएका थिए । कार्यक्रममा दर्शहरुको उल्लेख्य सहभागिता रहेको थियो । थ्रिडिभिएल क्रियसनका अध्यक्ष दिपक ओझाले कार्यक्रम आफूहरुले सोच भन्दा राम्रो भएको बताए ।
कार्यक्रममा निशुल्क प्रवेसको व्यवस्था गरिएको थियो । सांस्कृतिक कार्यक्रम संचालनको लागि रकम जुटाउन आयोजकले चिठ्ठा प्रतियोगिताको पनि आयोजना गरेको थियो । जसमा अत्तरियाका दान मडै प्रथम भएका छन । उनले पुरस्कार बाफत कम्प्युटर जितेका थिए ।
प्रतियोगितामा द्धितिय हुनेले साईकल, तृतिय हुनेले साधा मोबाईल सेट र अन्य १० जनाले घडि हात पारेका थिए । १ सय रुपैयाका करिब ९ सय टोकन काटिएको आयोजकले जनाएको छ । बृहत सांस्कृतिक कार्यक्रमको मुख्य प्रायोजना बनदेवी युवा क्लव र एल एण्ड एस कन्ट्रक्सनले गरेका थिए ।
अत्तरिया महोत्सव हुने नहुने अन्योल कायमै
अत्तरिया उद्योग बाणिज्य संघले आयोजन गर्ने महोत्सवबारे भने अझै अन्योल कायमै रहेको छ । कोरोना महामारीका कारण रोकिएको महोत्सव संचालनका लागि सरकारले अझै अनुमति नदिएका कारण महोत्सवबारे अझै अन्योल कायमै छ ।
अत्तरिया उद्योग बाणिज्य संघका अध्यक्ष अशोक देवकोटाले महोत्सव संचालनको अनुमति माग गर्दै गृह मन्त्रालयमा पत्राचार गरिएको बताए ।
‘हामीले महोत्सव संचालनका लागि पहल गरिदिन महासंघमा अनुरोध गरेका थियौ । महासंघले महोत्सवको मिति खुलाएर पत्र पठाउन भनेको थियो’ उनले भने ‘महासंघले हाम्रो पत्र गृह मन्त्रालयमा पठाएको छ । गृह मन्त्रालयले जिल्लालाई पत्र लेखेपछि जिल्लाले हामीलाई महोत्सव संचालन गर्न अनुमति दिने हो । तर, अहिले सम्म अनुमति दिईएको छैन ।’
उनले अत्तरियामा ‘सुदूरपश्चिम महोत्सव’ संचालनका लागि चैत्र २६ गतेको समय माग गरिएको बताए । उनले प्रशासनले अनुमति दिएर मौसमले साथ दिए महोत्सव आयोजना गरीने बताए ।
