धनगढी : धनगढी उपमहानगरपालिकामा कोरोना संक्रमितको संख्या तीन सय ६८ पुगेको छ। उपमहानगरपालिकाको स्वास्थ्य शाखाले दिएको जानकारी अनुसार १९ वटै वडाका तीन सय ६८ जनामा संक्रमण पुष्टि भएको हो।
संक्रमण पुष्टि भएका एक सय ९१ जना स्थानीय रहेको स्वास्थ्य शाखाका जनस्वास्थ्य निरिक्षक लक्ष्मीराज उपाध्यायले बताए। जुन कुल सक्रमितको ५२ प्रतिशत हुन्छ। उनका अनुसार एक जना स्थानीय संक्रमितको मृत्यु भईसकेको छ।
उपमहानगरपालिकामा एक सय ५५ जना संक्रिय संक्रमित रहेको उपाध्यायले बताए। उनीहरुमध्ये केहीको सेती प्रादेशिक अस्पताल र उपमहानगरपालिकाको आईसोलेसनमा उपचार भईरहेको छ भने बाँकी संक्रमित होम आईसोलेसनमा छन्।
स्वास्थ्य शाखाका जनस्वास्थ्य निरिक्षक उपाध्यायले स्वास्थ्यकर्मी, सुरक्षाकर्मी, व्यापारी, शिक्षक, एम्बुलेन्स चालक लगायतमा संक्रमण पुष्टि भएको बताए।
