कञ्चनपुर – शुक्लाफाँटा नगरपालिकाका २५ मुक्त हलिया परिवारलाई लालपूर्जा वितरण गरिएको छ। क श्रेणीको परिचपपत्र पाएका घर जग्गा नभएका मुक्त हलिया परिवारलाई लालपूर्जा वितरण गरिएको हो।
नगर प्रमुख दिलबहादुर ऐर, उपप्रमुख तुलसीदेवी हमाल र प्रमुख प्रशासकीय अधिकृत बिसनसिंह थापाले मुक्त हलियालाई लालपूर्जा हस्तान्तरण गरेका हुन्। वडा नम्बर १ बन्साहामा ५० लाख रुपैयाँमा मुक्त हलिया परिवारका लागि जग्गा खरिद गरिएको छ।
खरिद गरिएको जग्गाको लालपूर्जा मुक्त हलिया दिवशसका अवसरमा आइतबार हस्तान्तरण गरिएको नगर प्रमुख ऐरले बताए। ‘घरबासविहीन हलिया परिवारलाई जग्गाको मालिक बनाएका छौं,’ नगर प्रमुख ऐरले भने, ‘छिट्टै खरिद गरिएको जग्गामा आवास निर्माण गरी हस्तान्तरण गर्छौ।’
जग्गा र आवसाले मात्रै नपुग्ने भएकाले जीवन उपयोगी सीप सिकाई स्वरोजगार बनाउनका लागि कार्यक्रम सञ्चालन गरिने उनको भनाइ छ। मुक्त हलिया परिवारलाई साढे सात धुर जग्गा खरिदका लागि दुई लाखका दरले रकम छुट्याइएको थियो।
