बङ्गलादेशमा पूर्व प्रधानमन्त्री शेख हसिना समर्थित अवामी लिग पार्टीले यही नोभेम्बर ३० तारिखसम्म देशभर विरोध प्रदर्शन गर्ने भएको छ ।
अवामी लिगले आउँदो आइतबार ३० नोभेम्बरसम्म देशव्यापी विरोध प्रदर्शन आह्वान गरेको हो । अवामी लिगको आफ्नो आधिकारिक ‘एक्स’ मा जारी वक्तव्यमा अन्तरिम सरकारका प्रमुख मोहम्मद युनुसद्वारा हसिना र उनको पार्टीलाई आउँदो फेब्रुअरीमा हुने आम चुनावबाट बाहिर राख्न नियोजित रूपमा अदालतबाट फैसला गराइएको आरोप समेत लगाएको छ ।
हसिनालाई मृत्युदण्डको फैसला भएकोमा अवामी लिगले यसलाई अस्वीकार गरेको अन्तर्राष्ट्रिय सञ्चारमाध्यमले जनाएका छन् । उसले प्रधानमन्त्री युनुसले तत्काल राजीनामा दिनुपर्ने माग पनि गरेको छ । पूर्वप्रधानमन्त्री हसिनालाई मानवताविरुद्धको अपराधमा दोषी ठहर गर्दै अदालतले गएको मंसिर १ अर्थात् नोभेम्बर १७ तारिखमा मृत्युदण्डको फैसला सुनाएको थियो ।
बङ्गलादेशको अन्तर्राष्ट्रिय फौजदारी ट्राइब्युनल (आईसीटी) ले हसिनासहित उनको मन्त्रिपरिषद्मा आन्तरिक मामिलामन्त्री असदुज्जमान खान कमल र तत्कालीन प्रहरी प्रमुख चौधरी अबुल्लाह अल–मामुनलाई गएको वर्षको घटनामा दोषी ठहर गरेको थियो । भारतमा निर्वासनमा रहेकी हसिनाको अनुपस्थितिमै यो मुद्दा चलाइएको थियो ।
