डडेल्धुरा- डडेल्धुराको भागेश्वर गाउँपालिकाले वैकुण्ठ चतुर्दशीको अवसरमा सार्वजनिक विदा दिने निर्णय गरेको छ । गाउँकार्यपालिकाको निर्णयअनुसार कार्तिक १८ गते (मंगलवार) का दिन सम्पूर्ण कार्यालय तथा संस्थाहरूमा विदा रहने भएको हो ।
भागेश्वर गाउँपालिकाको केन्द्र बगरकोटमा रहेको भागेश्वर मन्दिर धुरामा हरेक वर्ष वैकुण्ठ चतुर्दशीको अवसरमा विशेष मेला लाग्ने परम्परा रहिआएको छ । सोही दिनको धार्मिक, सांस्कृतिक र सामाजिक महत्वलाई मध्यनजर गर्दै गाउँपालिकाले यो वर्ष पनि सार्वजनिक विदा दिने निर्णय गरेको प्रमुख प्रशासकीय अधिकृत लक्ष्मी दत्त भट्टले जानकारी दिनुभयो ।
गाउँपालिकाको निर्णय अनुसार सो दिन गाउँकार्यपालिकाको कार्यालय, वडा कार्यालयहरू, स्वास्थ्य संस्था, शैक्षिक संस्था तथा मातहतका अन्य संघसंस्थाहरू बन्द रहनेछन । तर, अत्यावश्यक सेवा भने सञ्चालनमा रहनेछ । गाउँपालिकाले सूचना सार्वजनिक गर्दै स्थानीयवासी, कर्मचारी, विद्यार्थी र सरोकारवाला सबैलाई मेलामा सहभागी भई धार्मिक तथा सांस्कृतिक परम्पराको संरक्षणमा हातेमालो गर्न आह्वान गरेको छ ।
