डाँका चोरी मुद्दामा २० वर्षपछि पक्राउ परेका चार जना अपराधीलाई एक सय ७० वर्षको कैद सजाय भएको छ ।
२० वर्षअघि बिभिन्न मितिमा ७÷८ जनाको समूहमा बनाई रातिको समयमा कैलालीको जोशी, भजनी, बौनिया, मुनुवा लगायतका क्षेमा हातहतियार सहित बिभिन्न व्यक्तिको घरमा पसेर लुटपाट गर्ने चार जना व्यक्तिलाई प्रहरीले भदौ ९ गते उनीहरुकै घरबाट पक्राउ गरेको हो ।
अदालतले गरेको फैसला अनुसार पक्राउ परेका चारै जनाको कैद सजाय जोड्दा एक सय ७० वर्ष हुन आउछ । अदालतले एउटै व्यक्तिलाई ८७ वर्ष कैद सजाय सुनाएको थियो ।
यसअघि पनि पक्राउ भएका उनीहरु भाग्न सफल भएका थिए ।
८ वटा डाँका मुद्दामा फरार अपराधी कैलालीको जोशी गाउँपालिका वडा नम्बर ६ वस्ने ४५ वर्षीय रोगही भन्ने करन राज थापालाई ८७ वर्ष कैद सजाय र ४४ हजार एक सय ५३ रुपैया जरिवाना भएको छ ।
प्रहरीले पक्राउ गरेका कैलालीको भजनी नगरपालिका वडा नम्बर ६ बस्ने टीकाराम चौधरी डगौरालाई ५ वटा डाँका चोरी मुद्दामा ३८ वर्ष कैद र नौ हजार ८ सय ४० रुपैया सजाय गरेको छ ।
उनी तत्कालिन थापापुरगाउँ विकास समितिकोभवनमा आगजनी गर्ने कार्यमा समेत संलग्न रहेको प्रहरीले जनाएको छ ।
त्यस्तै कैलालीको जोशीपुर गाउँपालिका–४ वस्ने ३८ वर्षीय कालु भन्ने गुन सिंह कठरियालाई चार वटा डाँका मुद्दामा ३९ वर्ष कैद र १४ हजार ७० रुपैया जरिवाना तोकिएको छ ।
यसैगरी डाँका चोरी मुद्दाका फरार अपराधी जोशीपुर गाउँपालिका–३ का ४९ वर्षीय रोहिना भन्ने भगत चौधरीलाई पनि प्रहरीले पक्राउ गरेको छ ।
उनीमाथि एउटा डाँका चोरीको मुद्दामा संलग्न भएको अभियोग प्रमाणित भएको थियो । उनलाई ६ वर्ष कैद र चार हजार पाँच सय रुपैया जरिवाना गरिएकोछ । उनी २०५७ सालमा पक्राउ परेका लागि कारागार चलान भएका थिए । उनी कारागारबाटै २०६१ साल माघ २७ गते फरार भएका थिए ।
