महेन्द्रनगर – जातीय विभेदमा परेको भीमदत्त नगरपालिका–१८ को ठडराई परिवारलाई मेलमिलाप गर्न धम्की आउन थालेको छ । तत्कालिन समाजवादी पार्टीकी केन्द्रीय सदस्यले आफूहरुलाई धम्काएर मेलमिलाप गर्न एक समूह नै घर पठाएकी छिमेकी कमल ठडराईको दावी छ ।
बुधबार आफनै घरमा खाना खान लागेको बेला ५ जना पुरुषको समूह आएर धम्काएको पीडित ठडराईले बताएका छन् ।
‘हिजो दिउँसो १ बजेतिर घरमा खाना खाईरहेको बेला काम छ बाहिर आउनुहोस भनी बोलाएर घर नजिक रहेको खोलामा लगेर नेगीलाई किन फसाउन खोजेको मिल्नुहोस भनेर धम्काए’, उनले भने, ‘५ जना थिए २ जना आएनन् अरु तीनजना भक्त बहादुर बिश्वकर्मा, मिनराज बडू र प्रकाश नेपालीले आफूलाई घरबाट बोलाएर धम्काएका हुन् ।
ठडराई परिवारले विगत ७ वर्षदेखि छिमेकी माया नेगीले आफूहरुमाथि जातीय विभेद गरिरहेका भन्दै प्रहरीमा जाहेरी दिने प्रयास गरिरहेका छन् । तर, प्रहरीले भने उनीहरुको जाहेरी दर्ता गरिरहेको छैन ।
जातीय विभेदको न्याय नपाएर पीडित भएकोे बेलामा यसरि दिनदिनै घरमै मान्छेहरु आएर धम्काउन खोज्दा आफूलगायत परिवारका अन्य सदस्यहरु असुरक्षित भएको महसुस गरेको ठडराईले बताए ।
जिल्ला प्रहरी कार्यालयमा उजुरी दिएको २ हप्ता बित्दा पनि निवेदन दर्ता नभएको भन्दै बुधबार जिल्ला हुलाक मार्फत जिल्ला प्रहरी कार्यालयमा फेरी निवेदन पठाएको कमलले बताए ।
उता सरकारी वकिल कार्यालयमा निवेदन दर्ता गर्दा उल्टै थर्काएर पठाएको उनले दावी गरे । यहाँ दर्ता हुदैन पहिला प्रहरीकोमा दर्ता गर्नु अनि यहाँ आउनु भन्दै पठाएको पीडितले बताए ।
