नेपाली काँग्रेस शुक्लाफाँटा नगरपालिका वडा नं. २ का एक दर्जन बढी क्रियाशील सदस्यहरूले पार्टी परित्याग गरेका छन् । वडा सभापति रामदत्त पन्तको अध्यक्षतामा बुधबार बसेको भेलामा उनी सहित वडा नं–२ का अन्य १४ जना क्रियाशील सदस्यहरूले पार्टी परित्याग गरेका हुन् ।
बुधबार बसेको भेलाले गत २०७४ सालमा सम्पन्न स्थानीय निर्वाचनमा नेपाली काँग्रेस शुक्लाफाँटा नगरपालिका वडा नं-२ का सभापति सहित बहुसंख्यक वडा कमिटीका सदस्यहरूको मागदाबी गरे बमोजिमका व्यक्तिलाई वडाध्यक्ष पदमा टिकट नदिई काँग्रेसको टिकट घोषणा गर्ने निकायले जनादेशको अवज्ञा गरि आफूखुसी टिकट वितरण गरेको आरोप लगाएको छ । गत निर्वाचनपछिको अवस्था र हालसम्म पनि पार्टीले आफूहरूलाई वेवास्ता गरेकाले पार्टी परित्याग गरेको नेपाली काँग्रेस जिल्ला कमिटी प्रशासन शाखा सदस्य प्रकाशदत्त भट्टले बताए । उनका अनुसार पार्टी परित्याग गरेका व्यक्तिहरूले तटस्थ र स्वतन्त्र बस्ने निर्णय गरेका छन् ।
पार्टी परित्याग गर्नेहरूमा वडा सभापति रामदत्त पन्त, क्षेत्रीय प्रतिनिधि तथा प्रशासन शाखा सदस्य प्रकाश भट्ट, क्षेत्रीय प्रतिनिधि लालसिंह विष्ट, वडा सचिव माधवराज पन्त, नगर सदस्य हेमराज पाण्डेय रहेका छन् । यस्तै पार्टी परित्याग गर्ने क्रियाशील सदस्यहरूमा डम्मर सिंह ऐर,लक्ष्मीराज शर्मा, पदमराज पन्त, राजबहादुर साउँद, धनबहादुर सिंह, भागरथी देवी बोहरा, मेघराज पन्त र पर्देशी डगौँरा रहेका छन् भने शिवराज भट्ट तरुण दलका नगर सचिव हुन् ।
