धनगढी,७ वैशाख । धनगढीको सौभाग्य हस्पिटल एण्ड रिसर्च सेन्टरले महिला लघुवित्त वित्तीय संस्था सुदूरपश्चिम अन्तरगतका शाखा कार्यालयमा आबद्ध सदस्यहरूलाई उपचार शुल्कमा छुट दिने भएको छ।
बिहीबार सौभाग्य हस्पिटल र महिला लघुवित्त वित्तीय संस्था धनगढीबीच उपचार शुल्कमा छुट दिने सम्झौता पत्र आदानप्रदान भएको हो। हस्पिटल सञ्चालक समितिका अध्यक्ष दिनेशराज जैशी र लघुवित्तका प्रदेश प्रमुख नारद न्यौपानेले सम्झौता पत्रमा हस्ताक्षर गरेका छन्।
यो सँगै अब सौभाग्य हस्पिटलमा लघुवित्तमा आबद्ध ग्राहक सदस्य र सदस्यको एकाघर परिवार र कर्मचारी तथा लगानीकर्ताहरूले उपचार शुल्कमा छुट पाउने भएका छन् । अस्पताल सञ्चालक समितिका अध्यक्ष जैशीका अनुसार ओपिडीमा १५ प्रतिशत , प्याथोलोजी, एक्स–रे, युएसजी,इण्डोस्कपी , नर्मल वेड, एचडियु बेड, एसी क्याबिन , सर्जरी , क्लोनोस्कपी र आईसियु/ एनआईसियुमा १० प्रतिशत तथा मेडिकल चेकअपमा ५ प्रतिशत छुट दिने सहमति भएको हो ।
बिशेष गरि महिला लघुबित्त वित्तीय संस्था लि. सुदुरपश्चिम अन्तरगतका शाखा कार्यालयमा आबद्ध सदस्यहरुका लागि यो सम्झौता गरिएको हो । उत्त सम्झौताले महिला लघुवित्त बित्तीय संस्था लि.मा आबद्ध महिला सदस्य तथा सदस्यका एकाघर परिवारलाई थोरै भए पनि राहात मिल्ने तथा सदस्यमा महिला लघुवित्त प्रतीको बिश्वासमा समेत विकास हुने प्रदेश प्रमुख न्यौपानेले बताए ।
