डडेल्धुरा ः डडेल्धुरामा ‘राष्ट्रिय गौरा महोत्सव २०७९’ मंगलवारबाट सुरु हुँदैछ । सुदूरपश्चिमेलीहरुको महान पर्व गौराको अवसरमा महोत्सवको आयोजना गरिएको आयोजक राधाकृष्ण मन्दिर विकास समिति डडेल्धुराले जनाएको छ ।
कोरोनाका कारणले तीन बर्ष यता कुनै कार्यक्रम हुन सकेका थिएनन् । आज औपचारिक कार्यक्रमका बिच गौरा महोत्वसको उद्ध्घाटन गरिने राधाकृष्ण मन्दिर विकास समितिका अध्यक्ष देवराज भट्टले बताए । महोत्सवमा सुदूरपश्चिमको नौ वटै जिल्ला सहित कालिकोट जिल्लाबाट समेत देउडीया कलाकारहरुको सहभागिता रहने उनले बताए ।
महोत्सवमा गौरानाच, वालो नाच, चैत, धुमारी, फाग, घुईचम्फा, हुड्केली, महिला तथा पुरुष देउडा जस्ता यहाँका कला–संस्कृती समेटीने गरि सांस्कृतिक कार्यक्रमहरू हुने र महोत्वसमा खेल खेल्ने देउडीयाहरुलाई सम्मान सहित नगद पुरस्कार प्रदान गर्ने पनि अध्यक्ष भट्टले जानकारी दिए ।
आफ्नो धर्म संस्कृतिको जर्गेना तथा स्थानीय कला संस्कृतीको सम्मान र युवापिढीमा हस्तान्तरण होस भन्ने उद्धेश्यले विगतका वर्षहरु झै यस वर्ष पनि राधाकृष्ण मन्दिर विकास समितिले राष्ट्रिय गौरा महोत्सव आयोजना गरेको अध्यक्ष भट्टले बताए ।
महोत्सव २४ गतेसम्म जिल्ला सदरमुकामको बसपार्कमा चल्नेछ ।
