धनगढी— पूर्वसचिव भीम उपाध्यायसहित केही समाजिक सञ्जाल प्रयोगकर्ताविरुद्ध प्रहरीको केन्द्रीय साइबर ब्युरोमा उजुरी परेको छ। कञ्चनपुरका २१ वर्षीय हेमराज अवस्थीले आज बुधबार ब्यूरोमा उजुरी दिएका हुन्।
अनेरास्वयू(क्रान्तिकारी) सुदूरपश्चिम विश्वविद्यालयका अध्यक्ष समेत रहेका अवस्थीले यहि फागुन १२ गते आफ्नो नाम जोडेर उपाध्ययसहित विभिन्न अनलाइन र सामाजिक सञ्जालका ग्रुपले घृणा र द्वेष फैलाउने कार्य गरेकाले कारबाहीको माग गरेका छन्।
उनले उपाध्यायसहित पत्रकार रवि लामिछाने र अलि त्रिपाठी समर्थक ग्रुप, हेमराज थापा सर्मथक ग्रुप, रामा ओली, आशिका तामाङ, शिक्षा, पावर थिङकिङ्ग, डेली नेपाल लगायतका ग्रुप सञ्चालक विरुद्ध ब्यूरोमा उजुरी दिएको बताए। हेमराज अवस्थीले सबैलाई विद्युतिय कारोबार ऐन, २०६३ को दफा ४७ र दफा ५३ बमोजिम कारबाहीको माग गरेका छन्।
फागुन १२ गते बिहीवार काठमाडौंमा एमसीसी विरुद्धको प्रदर्शनमा हेमराजको मृत्यु भएको भन्दै झुठो खबर फैलाइएको थियो। प्रदर्शनमा अर्का डडेल्धुराका हेमराज अवस्थी भने घाइते भएका थिए। हाल उनको उपचार भइरहेको छ। दिनेश खबर
